Shymkent qalasynda jyl sońynda birqatar bilim nysanynda qurylys jumystary aıaqtalady. Osy oraıda búgin qala ákimi Murat Áıtenov mektepterdiń qurylys barysyn aralap, jumystyń sapaly oryndalýyn baqylady, dep habarlaıdy Egemen.kz.
Qala ákimi aldymen qosymsha qurylysy júrgizilip jatqan bilim nysandarynda boldy. Búginde Tursynbaev kóshesindegi № 84 mekteptiń qosymsha qurylysy "Aq ordasy" JShS tarapynan júrgizilýde. Merdiger kompanııa qurylysty 25 jeltoqsanda aıaqtaýdy josparlaýda. Búginde jer jumystary men irgetasyn quıý tolyq aıaqtalǵan, plıta jabyny 70%, qabyrǵa jumystary 90% oryndalyp otyr.
Bas merdiger "О́mirzaq" JShS tarapynan júrgizilip jatqan № 17 mekteptiń qosymsha qurylysy naýryz aıynda bastalǵan. Nysan qurylysy jyl sońyna deıin aqtalady dep kútilýde. Aıta ótý kerek, №17 jáne 84 mekteptiń qurylysy "Jumyspen qamtý jol kartasy" baǵdarlamasy aıasynda iske asyrylýda.
Sondaı-aq Murat Dúısenbekuly Beket batyr – Táshenov kóshesiniń qıylysynda ornalasqan óner mektebiniń qurylysymen tanysty. Qurylysqa jaýapty bas merdiger mekeme – "RSÝ – 1" JShS-i. Negizgi ǵımarattyń jumystary jáne ishki sylaq jumystary tolyq 100% bitken, al abattandyrý jumystary 90% oryndaldy. Merdiger mekeme qurylys jumystaryn osy jyldyń jeltoqsan aıynda aıaqtaýdy josparlap otyr.
Jalpy Shymkent qalasy boıynsha jyl sońyna deıin jalpy 5100 oryndyq 9 mektepti paıdalanýǵa berý josparlanǵan. Qazirgi tańda 1200 oryndyq 2 mektep, 300 oryndyq 2 mektep el ıgiligine berildi.
Qarasha – jeltoqsan aralyǵynda qosymsha árqaısysy 300 oryndyq №17, 63, 84 mektep jáne bir óner mektebin paıdalanýǵa berý josparlanyp otyr.